Mot du directeur

Ech heeschen Iech häerzlech wëllkomm um Site vun eiser Schoul. Och no méi wéi 50 Joer pädagogescher Aktivitéit am ekonomesch-administrativem Beräich, feelt et eis net un Dynamik, Innovatioun a Courage nei Wee’er anzeschloen. Zanter 2015 si vill Neierungen zestane komm an hu wesentlech dozou bäigedroen dem ECG eng eemoleg Identitéit ze ginn.

Virun allem ass ze bemierken dat mir net nëmmen national an och international Unerkennung kritt hu fir all eis Beméiungen am Entreprenariat, mee dat dëst Engagement den Haaptpilier vun der Schoul ginn ass. Eise Schüler a Studente kenne mir esou formidabel Méiglechkeete gi fir si bei der Entwécklung vun hirem Bildungsprojet ze ënnerstëtzen. Dank enger grousser Zuel vun engagéierte Partner aus Beräicher wéi Industrie, Wirtschaft oder Handel, si mir beschtens opgestallt fir interessant an zukunftsorientéiert Programmer unzebidden. Besonnesch gëtt dëst visibel an eisen 2 Entrepreneurial weeks, déi mir mat villen externe Partner organiséieren, an déi sou och een Highlight an all Semester duerstellen.

Eis Sektiounen am Enseignement secondaire classique (CN – Entrepreneuriat, Finance et Marketing) wéi och am Enseignement secondaire général (GCF – Finance ; GMM – Marketing et Médias) erfreeën sech grousser Beléiftheet. Eis Sektioun GCG – Gestion wäert ab der Rentrée 2025 duerch eng nei Sektioun Affaires économiques ersat ginn. Déi nei Sektioun Affaires économiques ass gepräägt duerch een iwwerschaffte Konzept mat Schwéierpunkt Entreprenariat, Ekonomie an Informatik, en vue vun neie Beruffer déi sech konstant um Aarbechtsmaart entwéckelen.

Niewent der Sektioun Affaires économiques wäert och nach eng aner Sektioun ab der Rentrée 2025 an eiser offre scolaire sinn, an zwar déi vun der Data literacy. Eis Zäit ass a gëtt ëmmer méi markéiert vun onzielegen Daten. Dofir ass et wichteg eiser Jugend d’Méiglechkeet ze ginn sech mat den etheschen, politeschen a juristeschen Aspekter vun Daten ze beschäftegen a Kompetenzen z'entwéckelen Daten ze sammelen, ze liesen, z’analyséieren, ze verstoen an z’interpretéieren.

Och de BTS, mat sengen aktuell 5 Formatiounen, wäert am Viséier vun der Entwécklung sinn, a weider wichteg Adaptatiounen si geplangt.

Dir kënnt dofir gäre reegelméisseg op eisem Site oder op de soziale Medie luusse fir dat Dir informéiert bleift iwwert eis Programmer.

Mir sinn eng Schoul mat héischen Ambitiounen an Idealer, déi eise Schüler*innen a Student*innen déi bescht méiglechst Chancë soll gi fir e reusséierten Iwwergaang an d’Beruffsliewen oder an zukünfteg weiderféierend Studien. Fachlech Kompetenz gëtt grouss geschriwwe bei eis, mee net nëmmen, well och Wäerter si wichteg am Liewe fir de Jonken ze hëllefen zu responsabelen an aktive Bierger ze ginn. De jonke Mënsch gëtt ugespornt Initiativen ze huelen, seng Stäerkten ze erkennen an anzesetzen, awer och seng Schwächte wouer ze huelen an drun ze schaffen.

Ech invitéieren Iech éischt Informatiounen op eisem Site ze fannen an Iech vun der Vilfalt an der Qualitéit vun eisen Aktivitéiten ze iwwerzeegen. Wann eist Engagement a Konzept Iech gefält, dann zéckt nëmmen net Kontakt mat eis opzehuelen. 

Joseph Britz

Direkter